2003.06.21 Итальянсем - Шупашкарта… "Хыпар"

Халăх пултарулăхĕн «Атăлçи çăл куçĕсем» фестивальне хутшăнакансем Шупашкара килсе çитме пуçларĕç. Чи пĕрремĕшĕ Италири Лучинико хулинчи «Danzerini di Lucinico» фольклор ушкăнĕ пулчĕ. 1929 çулта Марио Чекута ял çыннисенчен ташă фольклор ушкăнĕ чăмăртаннă. Шăпах вĕсем çине тăнипе вырăнти халăх ташшисем çĕнĕрен чĕрĕлнĕ, паянхи куна çитнĕ. Хальхи вăхăтра ансамбльте 60 çын ытла. Вĕсем пĕрмаях çул çỹревре. Вĕри туйăмлă итальянсен пултарулăхĕпе Аргентина, Австрали, Австри, Бельги, Канада, Чехи, Хорвати, Eгипет, Франци, Германи, Греци, Голланди, Венгри, Польша, Румыни, Испани, Швеци, Швейцари, АПШ çыннисем паллашнă. Раççее пĕрремĕш хут килнĕ. «Danzerini di Lucinico» артисчĕсем хăйсен ташши–юрринче Италин çурçĕр–хĕвел тухăç çĕрĕнчи йăла– йĕркепе, ХVII ĕмĕртенпе упранса юлнă ташăпа паллаштараççĕ. Италирен килнĕ хăнасене Шупашкарти, Шăмăршăри, Çĕмĕрлери концерт лапамĕсенче çĕртмен 23, 24 тата 25– мĕшĕсенче курма пулĕ. Н.ГEOРГИEВА.